العجائز

السلام عليكم ورحمة الله وبركاته

اشحالكم عساكم بخير



1) الحريم و مرض السكر
تقول الوالده الحريم ما ياهن السكري و الضغط إلا من قل الحركه و اليلسه و الهيازه و البشاكير

2) أمراض الدم
لول العرب فيهم قمل يشرب الدم الخايس ومن إتنظفت العرب عفدت إبهم هالأعواق إلي ما ريناها في
عربنا لوليين(شفتو فايدة القمل).

3)الجن و المس
لول الدنيا فضا و الفرجان متباعده و كل فريج فيه كمن خيمه ينعدن عالصبوع, والجن سكون في الخلا
لكن من يانا الخير زادو الأوادم و زادت البيوت وعدو على بقع الجن, عاد الجن ما حصلو بقعه يسكنونها
قامو و سكنو في الأوادم

4)رغوة الحمام
دخل اخويه الصغير الله يعزكم الحمام و ترس البانيو ماء و رغوه, يوم دخلت يدتيه الحمام و شافت الرغوه قالت يالله بالستر بلاه مايكم وارم

5)البر و الموتر
يوم سرت ويا يدتيه العزبه يوم كنت صغير غرز الموتر و الهندي ما عرف شو يسوي نزلت أطالع السالفه, جان أقول ليدتيه إنزلي شوفي الموتر , لقيتها يالسه في السيت الجدامي و تدز الطابلون بريولها قلتلها شو تسوين؟ قالت: أدز الموتر عشان يظهر

6) الفتاين و الهزاب
تقول يدتيه لا تفتنون على الأوادم و إتهزبونهم لأن رب العالمين قال: الفتنه أشد من القتل